អាជ្ញាធរខណ្ឌជ្រោយចង្វារ ចុះឃាត់ក្មេងសិស្សសាលា២៧នាក់ ពេលកំពុងច្រៀងនៅក្លឹប ខារ៉ាអូខេ
26-December-2015 | ដោយ មួយឡា
ភ្នំពេញ៖ អាជ្ញាធរនិងកម្លាំងអាវុធហត្ថខណ្ឌជ្រោយចង្វារ ដឹកនាំដោយលោក ហ៊ុយ សារុន អភិបាលរងខណ្ឌជ្រោយចង្វារ នៅរសៀលថ្ងៃទី២៥ ខែធ្នូ ឆ្នាំ២០១៥ បានចុះទៅឃាត់ក្មេងៗសិស្សសាលាចំនួន២៧នាក់មានស្រីមានប្រុសភាគច្រើនមិនទាន់គ្រប់អាយុ ខណៈពួកគេកំពុងចូលច្រៀងនិងពពាក់ពពូនគ្នានៅក្លឹប «ដឺហាប់ ខារ៉ាអូខេគ្រួសារ» ទាំងថ្ងៃ ស្ថិតនៅតាមផ្លូវម៉ាស៊ីនទឹក ក្រុមទី៦ ភូមិ៣ សង្កាត់-ខណ្ឌជ្រោយចង្វារ រាជធានីភ្នំពេញ។
មូលហេតុដែលនាំឲ្យ អាជ្ញាធរខណ្ឌបើកប្រតិបត្តិការចុះទៅឃាត់ខ្លួនក្មេងសិស្សសាលាមានស្រីមានប្រុស នៅក្នុងក្លឹបមួយនេះដោយសារតែមានពាក្យបណ្តឹង របស់ប្រជាពលរដ្ឋដែលជាអណាព្យាបាលថា កូនៗរបស់ខ្លួនមិនសូវបានចូលរៀននោះទេ ដោយសារតែពួកគេបាននាំគ្នាទៅចូលច្រៀងនៅខារ៉ាអូខេខាងលើនេះស្ទើរជារៀងរាល់់ថ្ងៃ។
សិស្សសាលាទាំងនេះ ត្រូវបានអាជ្ញាធរអះអាងថារៀននៅតាមវិទ្យាល័យមួយចំនួននៅក្នុងខណ្ឌជ្រោយចង្វារ ហើយពួកគេមិនសូវបានចូលរៀននោះឡើយដោយនាំគ្នាមកចូលច្រៀងយ៉ាងពពាក់ពពូននៅទីនេះ។ សកម្មភាពបែបនេះដោយសារតែខាងម្ចាស់ក្លឹប បានបណ្តែតបណ្តោយដោយពុំបានហាមឃាត់ពួកគេ ។ ខណៈពេលដែលសមត្ថកិច្ចចុះទៅហាមឃាត់ ស្រាប់តែមានមេការម្ចាស់ក្លឹបមួយបានមកប្រាប់ថាពួកអស់លោកដឹងទេថាថោកែក្លឹបខារ៉ាអូខេមានតួនាទីធំណាស់ជាជំនួយការរបស់រដ្ឋមន្ត្រីមួយរូបហើយមេការរូបនេះបានប្រើពាក្យសម្តីព្រមានថា «អាជ្ញាធរខណ្ឌហឹ្នងប្រយ័ត្នជ្រុះស័ក្តិ» បើថៅកែរាយការណ៍ទៅរដ្ឋមន្ត្រីនោះ។
យ៉ាងណាក៏ដោយ សម្រាប់ក្មេងសិស្សទាំង២៧នាក់នោះ ត្រូវបានអាជ្ញាធរធ្វើការអប់រំដោយមានករធានាពីអាណាព្យាបាលនិងដោះលែងត្រឡប់ទៅវិញ នាល្ងាចថ្ងៃទី២៥ ខែធ្នូ ឆ្នាំ២០១៥ ។ យោងតាមការបញ្ជារបស់លោក ឃ្លាំង ហួត អភិបាលខណ្ឌជ្រោយចង្វារសំរេចបិទក្លឹបខារ៉ាអូខេមួយរយៈរង់ចាំការដោះស្រាយបន្ដ៕ ដោយមែន កំសត់
ចំនួនអ្នកទស្សនា
- ថ្ងៃនេះ1501
- ម្សិលមិញ12561
- សប្តាហ៍នេះ29451
- ខែនេះ51331
- ឆ្នាំនេះ51331
- សរុប20493787